പൂജ്യത്തിന് പുറത്തായി; ഐപിഎല്‍ ടീം ഉടമ കരണത്തടിച്ചെന്ന് റോസ്‌ ടെ‌യ്‌ലര്‍

Metrom Australia Aug. 14, 2022

വെല്ലിംഗ്ടണ്‍: ഐപിഎല്ലില്‍ രാജസ്ഥാന്‍ റോയല്‍സ് ടീം അംഗമായിരുന്ന കാലത്ത് പഞ്ചാബ് കിംഗ്സിനെതിരായ മത്സരത്തില്‍ ചേസ് ചെയ്യുന്നതിനിടെ പൂജ്യത്തിന് പുറത്തായതിന്‍റെ പേരില്‍ ടീം ഉടമ മൂന്നോ നാലോ തവണ കരണത്തടിച്ചുവെന്ന് റോസ് ടെയ്‌ലറിന്റെ വെളിപ്പെടുത്തൽ. തന്റെ ആത്മകഥയായ 'ബ്ലാക്ക് ആന്‍ഡ് വൈറ്റി'ലാണ് ടൈലർ പറയുന്നത്.

ശക്തമായല്ല അടിച്ചതെങ്കിലും അത് ശരിക്കും അടിച്ചതാണോ അതോ തമാശയായിരുന്നോ എന്ന് തനിക്ക് ഇപ്പോഴും ഉറപ്പില്ലെന്നും ടെയ്‌ലര്‍ പുസ്തക്കത്തില്‍ പറയുന്നു. പ‌ഞ്ചാബ് ഉയര്‍ത്തിയ 195 റണ്‍സ് വിജയലക്ഷ്യം പിന്തുടര്‍ന്ന മത്സരത്തിലാണ് ടെയ്‌ലര്‍ എല്‍ബിഡബ്ല്യു ആയി പൂജ്യത്തിന് പുറത്തായത്. മത്സരശേഷം ടീം അംഗങ്ങളും സപ്പോര്‍ട്ട് സ്റ്റാഫും താമസിക്കുന്ന ഹോട്ടലിന്‍റെ ടോപ്പിലെ ബാറില്‍ ഇരിക്കുകയായിരുന്നു. രാജസ്ഥാന്‍ നായകനായിരുന്ന ഷെയ്ന്‍ വോണും കാമുകിയായ ലിസ് ഹർളിയും ഈ സമയം അവിടെയുണ്ടായിരുന്നു.

ഈ സമയം രാജസ്ഥാന്‍ ടീം ഉടമകളിലൊരാള്‍ എന്‍റെ അടുത്ത് വന്നു. 'റോസ്, നിങ്ങള്‍ക്ക് ലക്ഷങ്ങള്‍ ഞങ്ങള്‍ തരുന്നത് പൂജ്യത്തിന് പുറത്താവാനല്ലെ'ന്ന് പറഞ്ഞ് മുഖത്ത് മൂന്ന് നാലു തവണ അടിച്ചു. അതിനുശേഷം അദ്ദേഹം ചിരിക്കുകയായിരുന്നു. അദ്ദേഹം തമാശയായാണോ അത് ചെയ്തതെന്ന് തനിക്കിപ്പോഴും ഉറപ്പില്ലെന്ന് ടെയ്‌ലറുടെ പുസ്തകത്തെ ഉദ്ധരിച്ച് stuff.co.nz റിപ്പോര്‍ട്ട് ചെയ്യുന്നു. ആ സാഹചര്യത്തില്‍ താന്‍ അത് വലിയൊരു പ്രശ്നമായി ഉയര്‍ത്തിക്കൊണ്ടുവന്നില്ലെങ്കിലും ഇതുപോലുള്ള സംഭവങ്ങള്‍ പ്രഫഷണല്‍ കരിയറില്‍ നിരവധി താരങ്ങള്‍ക്ക് ഉണ്ടായിട്ടുണ്ടാകാമെന്നത് തനിക്ക് സങ്കല്‍പ്പിക്കാന്‍ പോലുമായില്ലെന്നും ടെയ്‌ലര്‍ പറയുന്നു.

വാർത്തകൾ വേഗത്തിലും കൃത്യതയോടെയും അറിയാൻ ഞങ്ങളുടെ വാട്സ് ആപ്പ് ഗ്രൂപ്പിൽ ജോയിന്റ് ചെയ്യാൻ ഇവിടെ ക്ലിക്ക് ചെയ്യൂ.

ഓസ്കാർ ഒഫീഷ്യൽ പേജിൽ 'ലാൽ സിം​ഗ് ഛദ്ദ'യും

Metrom Australia Aug. 14, 2022

ടോം ഹാങ്ക്സ് ചിത്രം 'ഫോറസ്ററ് ഗമ്പി'ന്റെ ഇന്ത്യൻ റീമേക്ക് 'ലാൽ സിം​ഗ് ഛദ്ദ'യുടെ രംഗങ്ങൾ അക്കാദമിയുടെ ഒഫീഷ്യൽ ഇൻസ്റ്റഗ്രാം പേജിൽ പങ്കുവെച്ചിരിക്കുകയാണ്. ഫോറസ്ററ് ഗമ്പിന്റെ രംഗങ്ങളും ലാൽ സിം​ഗ് ഛദ്ദയിൽ ആമിർ ഖാൻ അത് പുനരവതരിപ്പിച്ചതും ചേർത്തതാണ് വീഡിയോ.

'റോബർട്ട് സെമെക്കിസും എറിക് റോത്തും ചേർന്ന് അവതരിപ്പിച്ച ദയ കൊണ്ട് ലോകത്തെ മാറ്റുന്ന ഒരു മനുഷ്യന്റെ കഥയ്ക്ക് ഇന്ത്യയിൽ നിന്നുമൊരു റീമേക്ക്, അദ്വൈത് ചന്ദന്റെയും അതുൽ കുൽക്കർണിയുടെയും 'ലാൽ സിംഗ് ഛദ്ദ'. ടോം ഹാങ്ക്‌സ് അവതരിപ്പിച്ച പ്രധാന കഥാപാത്രമായെത്തുന്നത് ആമിർ ഖാനാണ്' അക്കാദമിയുടെ ഒഫീഷ്യൽ ഇൻസ്റ്റഗ്രാം പേജിൽ കുറിച്ചു. 

അതേസമയം 'ഫോറസ്ററ് ഗമ്പി'ന്റെ ഇൻസ്റ്റഗ്രാം പേജിലൂടെയും വീഡിയോ ഷെയർ ചെയ്തിട്ടുണ്ട്. അടുത്തിടെ നടന്ന ഒരു പത്രസമ്മേളനത്തിൽ, താൻ ഹാങ്ക്‌സിന് കത്തെഴുതിയിട്ടുണ്ടെന്നും അദ്ദേഹം സിനിമ കാണാൻ ആഗ്രഹിക്കുന്നുവെന്നും ആമിർ പറഞ്ഞിരുന്നു.

വാർത്തകൾ വേഗത്തിലും കൃത്യതയോടെയും അറിയാൻ ഞങ്ങളുടെ വാട്സ് ആപ്പ് ഗ്രൂപ്പിൽ ജോയിന്റ് ചെയ്യാൻ ഇവിടെ ക്ലിക്ക് ചെയ്യൂ.

സിഡ്‌നി മലയാളി അസോസിയേഷന് (SYDMAL) നവ നേതൃത്വം

Metrom Australia Aug. 13, 2022

സിഡ്‌നിയിലെ പ്രമുഖ സാംസ്‌കാരിക സംഘടനയായ സിഡ്‌നി മലയാളി അസോസിയേഷന്റെ 2022 -24 വർഷത്തെ ഭാരവാഹികളെയും കമ്മറ്റി അംഗങ്ങളെയും ഓഗസ്റ്റ് 13 നു വെന്റവര്തവില്ലിലെ Uniting Church Hall-ൽ വെച്ച്  നടന്ന പൊതുയോഗത്തിൽ (AGM) തിരഞ്ഞെടുക്കപ്പെട്ടു.

ബീന രവികുമാർ (പ്രസിഡന്റ്), ലളിത പോൾ (വൈസ് പ്രസിഡന്റ്), വിജയ് (സെക്രട്ടറി), നിതിൻ സൽഗുണം (ട്രഷറർ), എന്നിവർ ഭാരവാഹികളായും ബിന്ദു അനിൽകുമാർ, ജോർജ് തോമസ്, ജെറോമി ജോസഫ്, ജിജി പീടികയിൽ, റോയ് വര്ഗീസ്, തോമസ് കുരുവിള എന്നിവർ എക്സിക്യൂട്ടീവ് കമ്മിറ്റി അംഗങ്ങളായും ആൽവിൻ വര്ഗീസ്, ലിമ വിജയ് എന്നിവർ യാഥാക്രമം യൂത്ത് ഫോറം, വിമൻസ് ഫോറം പ്രതിനിധികളെയും തിരഞ്ഞെടുക്കപ്പെട്ടു. ജോൺ ജേക്കബ് പബ്ലിക് ഓഫീസർ ആയി തുടരും. നിലവിലെ പ്രസിഡന്റ്റ്  കെ.പി. ജോസിന്റെ അധ്യക്ഷതയിൽ കൂടിയ പൊതുയോഗത്തിൽ 2021 -22 വർഷത്തെ പ്രവർത്തന റിപ്പോർട്ട് സെക്രട്ടറി ഷീജ നന്ദകുമാറും വരവ്  ചെലവ് കണക്ക് ട്രഷറർ അനീഷ് ഫിലിപ്പും അവതരിപ്പിച്ചു.

'Mum & Dad' മെസേജ് തട്ടിപ്പ് സജീവമാകുന്നു

Metrom Australia Aug. 13, 2022

മാതാപിതാക്കളെ ലക്ഷ്യമിട്ട് കൊണ്ടുള്ള 'Mum & Dad' മെസേജ് തട്ടിപ്പ് സജീവമാകുന്നു. കുട്ടികൾ അടിയന്തര ഘട്ടത്തിൽ സാമ്പത്തിക സഹായം ആവശ്യപ്പെടുന്ന രീതിയിലുള്ള സന്ദേശങ്ങൾ അയച്ചാണ് തട്ടിപ്പ്. വാട്ട്സ് ആപ്പ് വഴിയും, ടെക്സ്റ്റ് മെസേജുകൾ വഴിയുമാണ് മാതാപിതാക്കൾക്ക് സന്ദേശങ്ങൾ ലഭിക്കുന്നത്. ഇത്തരത്തിൽ വിക്ടോറിയയിൽ മാത്രം ‘mum & dad’ തട്ടിപ്പിന് 25 പേർ ഇരയായെന്നാണ് കണക്ക്.

അജ്ഞാത നമ്പറിൽ നിന്നാണ് ഈ സന്ദേശങ്ങൾ അയക്കുന്നത്. ഈ സന്ദേശങ്ങളിലൂടെ മാത്രമാകും തട്ടിപ്പുകാർ ആശയ വിനിമയം നടത്തുക. ഈ സന്ദേശങ്ങളിൽ അടിയന്തര സാഹചര്യം ചൂണ്ടിക്കാട്ടി പണം അയക്കാനാണ് തട്ടിപ്പുകാർ ആവശ്യപ്പെടുന്നത്. വിദേശ രാജ്യങ്ങൾ കേന്ദ്രീകരിച്ചാണ് തട്ടിപ്പുകാർ പ്രവർത്തിക്കുന്നത്.

ഫോൺ നഷ്ടമായെന്നോ, കേടുപാട് സംഭവിച്ചെന്നോ വ്യക്തമാക്കുന്ന  സന്ദേശങ്ങളാണ് കുടുംബാംഗങ്ങൾക്ക് ലഭിക്കുന്നത്. കൂടാതെ താത്കാലിക നമ്പറാണ് ഉപയോഗിക്കുന്നതെന്നും, അടിയന്തര ആവശ്യത്തിന് പണം വേണമെന്നും കുട്ടികൾ എന്ന വ്യാജേന തട്ടിപ്പുകാർ സന്ദേശത്തിലൂടെ ആവശ്യപ്പെടുന്നു. 

അതേസമയം ചില സന്ദർഭങ്ങളിൽ ‘പഴയ ഫോൺ നമ്പർ’ ഡിലീറ്റ് ചെയ്യാനോ, ബ്ലോക്ക് ചെയ്യാനോ തട്ടിപ്പുകാർ ആവശ്യപ്പെടാറുണ്ടെന്ന് സ്കാംവാച്ച് ഓസട്രേലിയ വ്യക്തമാക്കുന്നു. ഇതിനിടയിൽ 
തട്ടിപ്പിന് ഇരയാകുന്നവർ പോലീസിനെ ബന്ധപ്പെടണമെന്നും, ഉടൻ തന്നെ ബാങ്കിനെ വിവരം അറിയിക്കണമെന്നാണ് പോലീസ് നിർദ്ദേശം.

കുട്ടികൾ പ്രതസന്ധിയിലാണെന്ന് കേൾക്കുമ്പോൾ മാതാപിതാക്കൾക്കുണ്ടാകുന്ന മാനസീക വിഷമത്തെയാണ് തട്ടിപ്പുകാർ മുതലെടുക്കുന്നതെന്ന് സൈബർ ക്രൈം സ്ക്വാഡിലെ ഡിറ്റക്ടീവ് സർജന്റ് ജോൺ ചെയ്ൻ വിശദമാക്കി. എന്നാൽ അജ്ഞാത നമ്പറിൽ നിന്ന് പണം ആവശ്യപ്പെട്ടുള്ള സന്ദേശം ലഭിച്ചാൽ, ആവശ്യപ്പെടുന്നത് ആരാണെന്ന് സ്ഥിരീകരിക്കണമെന്നും ജോൺ ചെയ്ൻ നിർദ്ദേശിച്ചു.

വാർത്തകൾ വേഗത്തിലും കൃത്യതയോടെയും അറിയാൻ ഞങ്ങളുടെ വാട്സ് ആപ്പ് ഗ്രൂപ്പിൽ ജോയിന്റ് ചെയ്യാൻ ഇവിടെ ക്ലിക്ക് ചെയ്യൂ.

അസാഞ്ചെക്കെതിരായ കേസ് മാധ്യമ സ്വാതന്ത്ര്യത്തെ അപകടത്തിലാക്കുന്നുവെന്ന് സ്റ്റെല്ല മോറിസ് അസാഞ്ചെ

Metrom Australia Aug. 13, 2022

പാരിസ്: വികിലീക്സ് സ്ഥാപകന്‍ ജൂലിയന്‍ അസാഞ്ചെക്കെതിരെ നിലനില്‍ക്കുന്ന കേസുകള്‍ മാധ്യമ സ്വാതന്ത്ര്യത്തെ തന്നെ അപകടത്തിലാക്കുന്നവയെന്ന് ഭാര്യ സ്റ്റെല്ല മോറിസ് അസാഞ്ചെ അഭിപ്രായപ്പെട്ടു. മനുഷ്യാവകാശ അഭിഭാഷക കൂടിയായ സ്റ്റെല്ല
ജര്‍മന്‍ മാധ്യമമായ ഡ്യൂട്ഷെ വെല്ലെയോടാണ് ഇക്കാര്യം പങ്കുവെച്ചത്. 

 ജൂലിയന്‍ അസാഞ്ചെയെ കൈമാറ്റം ചെയ്ത് കിട്ടുന്നതിനായി നടക്കുന്ന കേസുകള്‍ ലോകമെമ്പാടും പത്ര സ്വാതന്ത്ര്യത്തിന് അപകടകരമായ മാതൃക സൃഷ്ടിച്ചിരിക്കുകയാണ് എന്നാണ് സ്റ്റെല്ല പ്രതികരിച്ചത്. ബ്രിട്ടനില്‍ നിന്നും അസാഞ്ചെയെ കൈമാറ്റം ചെയ്ത് കിട്ടുന്നതിനായുള്ള യു.എസിന്റെ ശ്രമങ്ങളെ ഉദ്ധരിച്ച് കൊണ്ടാണ് അഭിപ്രായം. 

”ആഗോളതലത്തില്‍ തന്നെ പത്രസ്വാതന്ത്ര്യത്തിന് നേരെയുള്ള ഏറ്റവും അപകടകരമായ ആക്രമണമാണിത്. യു.എസിന് പുറത്ത് ജോലി ചെയ്യുന്ന, യു.എസിന്റെ യുദ്ധ കുറ്റകൃത്യങ്ങള്‍ പുറത്തുവിട്ട ഒരു വിദേശ പത്രപ്രവര്‍ത്തകനെ പിന്തുടരുന്നത് അമേരിക്കയാണ്,” - എന്നാണ് സ്റ്റെല്ല പറഞ്ഞത്. 

അതേസമയം 2006ല്‍ ഐസ്‌ലന്‍ഡില്‍ സ്ഥാപിക്കപ്പെട്ട വികിലീക്‌സ് വെബ്‌സൈറ്റ്, സൗദി അറേബ്യ, അമേരിക്ക അടക്കമുള്ള നിരവധി രാജ്യങ്ങള്‍ പൂഴ്ത്തിവെച്ചിരുന്ന സുരക്ഷാ- രഹസ്യരേഖകള്‍ പുറത്തുവിട്ടിരുന്നു. ഇറാഖിലും അഫ്ഗാനിസ്ഥാനിലും അമേരിക്ക നടത്തിയ, റിപ്പോര്‍ട്ട് ചെയ്യപ്പെടാതെ പോയ, സൈനിക ഓപ്പറേഷനുകളെക്കുറിച്ചും അതില്‍ കൊല്ലപ്പെട്ടവരുടെ വിവരങ്ങളുമാണ് 2010, 2011 വര്‍ഷങ്ങളിലായി വികിലീക്‌സ് പുറത്തുവിട്ടത്. ഇതിന്റെ പേരില്‍ അമേരിക്ക അസാഞ്ചെക്കെതിരെ കേസെടുക്കുകയായിരുന്നു.

നേരത്തെ വികിലീക്‌സിനെതിരെ കേസുകള്‍ വന്നതോടെ സ്ഥാപകനായ അസാഞ്ചെ 2012ല്‍ ലണ്ടനിലെ ഇക്വഡോര്‍ എംബസിയില്‍ അഭയം തേടി. പിന്നീട് ഏഴ് വര്‍ഷത്തിന് ശേഷമാണ് അദ്ദേഹത്തെ ബ്രിട്ടീഷ് പൊലീസ് അറസ്റ്റ് ചെയ്തത്.

അസാഞ്ചെയെ ബ്രിട്ടനില്‍ നിന്നും കൈമാറ്റം ചെയ്തുകിട്ടാന്‍ അമേരിക്ക നേരത്തെ തന്നെ ശ്രമങ്ങള്‍ ആരംഭിച്ചിരുന്നു. ഇപ്പോള്‍ ബ്രിട്ടന്‍ അതിന് അനുമതി നല്‍കി. ഇതിനെതിരെ അസാഞ്ചെ നിയമപോരാട്ടം നടത്തുന്നുണ്ട്. തന്നെ യു.എസിന് കൈമാറുന്നതിനെതിരെ ബിട്ടീഷ് സുപ്രീംകോടതിയില്‍ അപ്പീല്‍ പോകാനുള്ള അസാഞ്ചെയുടെ അപേക്ഷ ബ്രിട്ടീഷ് കീഴ്ക്കോടതി നേരത്തെ തള്ളിയിരുന്നു.

വാർത്തകൾ വേഗത്തിലും കൃത്യതയോടെയും അറിയാൻ ഞങ്ങളുടെ വാട്സ് ആപ്പ് ഗ്രൂപ്പിൽ ജോയിന്റ് ചെയ്യാൻ ഇവിടെ ക്ലിക്ക് ചെയ്യൂ.