രാഷ്ട്രപതി തെരഞ്ഞെടുപ്പ് ജൂലൈ 18ന്

Metrom Australia June 10, 2022 GOVERNMENT

ന്യൂഡൽഹി: രാഷ്ട്രപതി തെരഞ്ഞെടുപ്പ് ജൂലൈ 18ന് നടക്കുമെന്ന് മുഖ്യ തെരഞ്ഞെടുപ്പ് കമ്മീഷണർ രാജീവ് കുമാർ അറിച്ചു. ജൂലൈ 21ന് ഫലപ്രഖ്യാപനം ഉണ്ടാകും. രാഷ്ട്രപതി രാംനാഥ് കോവിന്ദിന്റെ കാലാവധി ജൂലൈ 24ന് അവസാനിക്കാനിരിക്കെയാണ് തെരഞ്ഞെടുപ്പ് പ്രഖ്യാപിച്ചിരിക്കുന്നത്. ഭരണഘടനയുടെ 62-ാം അനുച്ഛേദപ്രകാരം, നിലവിലെ രാഷ്ട്രപതിയുടെ കാലാവധി പൂർത്തിയാകുന്നതിന് മുൻപ് തന്നെ അടുത്ത രാഷ്ട്രപതിക്കായി തെരഞ്ഞെടുപ്പ് നടക്കണമെന്നാണ് പറയുന്നത്.

തെരഞ്ഞെടുപ്പുമായി ബന്ധപ്പെട്ട വിജ്ഞാപനം ഈ മാസം 15ന് തെരഞ്ഞെടുപ്പ് കമ്മീഷൻ പുറത്തിറക്കും. ജൂൺ 29 വരെ നാമനിർദേശ പത്രിക നൽകാനാകും. ജൂൺ 30ന് സൂക്ഷ്മ പരിശോധന പൂർത്തിയാകും. പുതുതായി രാജ്യസഭയിലേക്ക് തെരഞ്ഞെടുക്കപ്പെട്ട 57 പേർക്കും വോട്ട് ചെയ്യാനാകും. അതേസമയം, രാഷ്ട്രീയ പാർട്ടികൾക്ക് വിപ്പ് നൽകാനാകില്ല.

ലോക്സഭയിലെയും രാജ്യസഭയിലെയും തിരഞ്ഞെടുക്കപ്പെട്ട അംഗങ്ങളും സംസ്ഥാന നിയമസഭകളിലെയും ഡൽഹിയിലെയും കേന്ദ്രഭരണ പ്രദേശമായ പുതുച്ചേരിയിലെയും തിരഞ്ഞെടുക്കപ്പെട്ട അംഗങ്ങളും ഉൾപ്പെടുന്ന ഇലക്ടറൽ കോളജ് ആണ് രാഷ്ട്രപതിയെ തെരഞ്ഞെടുക്കുന്നത്. രാജ്യസഭാംഗങ്ങളും ലോക്സഭാംഗങ്ങളും നിയമസഭാ സാമാജികരും ഉൾപ്പെടെ ആകെ 4,809 വോട്ടർമാർ അടങ്ങുന്നതാണ് ഇത്തവണത്തെ ഇലക്ടറൽ കോളജ്.

അതേസമയം പൂർണമായും കോവിഡ് പ്രോട്ടോക്കോൾ പാലിച്ചായിരിക്കും തെരഞ്ഞെടുപ്പ് നടക്കുക. തെരഞ്ഞെടുപ്പ് കമ്മീഷൻ നൽകുന്ന പേന ഉപയോഗിച്ചാണ് വോട്ട് രേഖപ്പെടുത്തേണ്ടത്. അല്ലാത്ത പേന ഉപയോഗിച്ചാൽ വോട്ട് അസാധുവാകും.

ന്യൂസിലാൻഡ് വിമാനത്താവളത്തിൽ ഗോമൂത്രം പിടികൂടി നശിപ്പിച്ചു

Metrom Australia May 21, 2022 GOVERNMENT

ക്രൈസ്റ്റ്ചർച്ച്: ന്യൂസിലാൻഡിൽ വിദേശ യാത്രക്കാരനിൽ നിന്ന് ഗോമൂത്രം പിടിച്ചെടുത്തു. രണ്ടു കുപ്പി 'ഗോമാതാ' ഗോമൂത്രമാണ് പിടിച്ചെടുത്ത് നശിപ്പിച്ചതായി  ക്രൈസ്റ്റ്ചർച്ച് വിമാനത്താവളം അധികൃതർ വ്യക്തമാക്കിയത്. പിടിച്ചെടുത്ത രണ്ടു ഗോമൂത്ര ബോട്ടിലുകളുടെ ചിത്രവും പ്രൈമറി ഇൻഡസ്ട്രീസ് മന്ത്രാലയം പുറത്തുവിട്ടിട്ടുണ്ട്.

എന്നാൽ അന്താരാഷ്ട്ര അതിർത്തികൾ തുറക്കുന്നതിന്റെ ഭാഗമായുള്ള പതിവു സുരക്ഷാ പരിശോധനയിലാണ് ബോട്ടിലുകള്‍ കണ്ടെത്തിയത്. ഗോമൂത്രം ഗുരുതര അസുഖങ്ങൾക്ക് കാരണമാകുമെന്നും അധികൃതർ പ്രസ്താവനയിൽ വ്യക്തമാക്കി. 

'ക്രൈസ്റ്റ് ചർച്ച് വിമാനത്താവളത്തിലെ പതിവു പരിശോധയ്ക്കിടെ ഈയിടെ രണ്ടു കുപ്പി ഗോമൂത്രം പിടിച്ചെടുത്തു നശിപ്പിച്ചു. ഇത്തരത്തിലുള്ള ഉത്പന്നങ്ങൾ ഗുരുതരമായ അസുഖങ്ങൾക്ക് കാരണമാകുന്നു. കാലിലും വായയിലും അസുഖങ്ങൾക്ക് വഴി വയ്ക്കുന്നു. ചില ഹൈന്ദവ പാരമ്പര്യപ്രകാരം ഗോമൂത്രം പ്രാർത്ഥനയ്ക്കായി ഉപയോഗിക്കുന്നുണ്ട്. എന്നാൽ ജൈവസുരക്ഷാ ബുദ്ധിമുട്ടുകൾ മൂലം ഗോമൂത്രം രാജ്യത്തേക്ക് അനുവദിക്കാനാകില്ല.' - എന്ന് പ്രസ്താവനയിൽ വ്യക്തമാക്കി.

ശരിയായ രീതിയിലുള്ള ഉപയോഗത്തിനാണ് ഗോമൂത്രം കയ്യിൽ കരുതിയതെന്ന് യാത്രക്കാരൻ വിശദീകരിച്ചതായും പ്രസ്താവനയിൽ പറയുന്നുണ്ട്. എന്നാൽ ലഗേജിൽ ഇത്തരം വസ്തുക്കൾ കൊണ്ടുവരരുത് എന്നാണ് അധികൃതകരുടെ നിർദേശം. സംഭവിക്കുന്ന പക്ഷം പിഴയോ കുറ്റവിചാരണയോ നേരിടേണ്ടി വരുമെന്നും പ്രൈമറി ഇൻഡസ്ട്രീസ് മന്ത്രാലയം വ്യക്തമാക്കി. യാത്രക്കാരന്റ വ്യക്തിവിവരങ്ങൾ അധികൃതർ പുറത്തു വിട്ടിട്ടില്ല. 2015ൽ രണ്ടു കുപ്പി ഗോമൂത്രം കൊണ്ടുപോയതിന് ഇന്ത്യൻ വംശജയായ യാത്രക്കാരിക്ക് ന്യൂസിലാൻഡ് കസ്റ്റംസ് 400 ഡോളർ പിഴ ചുമത്തിയിരുന്നു. 

ശ്രീലങ്കയിൽ എല്ലാ പാർട്ടികളെയും ഉൾപ്പെടുത്തി ദേശീയസമിതി രൂപീകരിക്കും: പ്രധാനമന്ത്രി

Metrom Australia May 17, 2022 GOVERNMENT

എല്ലാ രാഷ്ട്രീയ പാർട്ടികളെയും ഉൾപ്പെടുത്തി ദേശീയസമിതി രൂപീകരിക്കുമെന്ന് ശ്രീലങ്കൻ പ്രധാനമന്ത്രി റനിൽ വിക്രമസിംഗെ. രാജ്യത്തെ ജനങ്ങളെ അഭിസംബോധന ചെയ്‌തു സംസാരിക്കുന്ന വേളയിലായിരുന്നു പ്രഖ്യാപനങ്ങൾ. ‘അപകടകരമായ നിലയിലാണ് രാജ്യത്തെ സാമ്പത്തിക പ്രതിസന്ധി നിലകൊള്ളുന്നത്. ഇതു പരിഹരിക്കേണ്ടത്  രാജ്യത്തിന്റെ പ്രധാന ആവശ്യമാണ്.  ഇതിനായി എല്ലാ രാഷ്ട്രീയ പാർട്ടികളെയും ഉൾപ്പെടുത്തി ദേശീയ സമിതി രൂപീകരിക്കും’- വിക്രമസിംഗെ പറഞ്ഞു.

അടുത്ത രണ്ടു മാസങ്ങൾ വളരെ നിർണ്ണായകമാണെന്നും ജനമൊന്നാകെ ഒരുങ്ങിയിരിക്കണമെന്നും ചില ത്യാഗങ്ങളും വിട്ടുവീഴ്ചയും ചെയ്യാൻ തയ്യാറാകണമെന്നും അദ്ദേഹം അഭിപ്രായപ്പെട്ടു. 2022  വികസന ബജറ്റിന് പകരം ആശ്വാസ ബജറ്റ് തയ്യാറാക്കാൻ സർക്കാർ ഒരുങ്ങുക്കയാണ്.  ശ്രീലങ്കൻ എയർലൈൻസ് സ്വകാര്യവൽക്കരിക്കുന്നതുൾപ്പെടെ നടപടികൾക്ക് ഒരുങ്ങുനതായും പ്രധാനമന്ത്രി അറിയിച്ചു.

ഫ്രാന്‍സിന് മൂന്ന് പതിറ്റാണ്ടിന് ശേഷം വനിതാ പ്രധാനമന്ത്രി

Metrom Australia May 17, 2022 GOVERNMENT

മൂന്ന് പതിറ്റാണ്ടിനുശേഷം  ഫ്രാന്‍സിന് ഒരു വനിതാ പ്രധാനമന്ത്രി. ഫ്രാന്‍സിലെ തൊഴില്‍ മന്ത്രിയായ എലിസബത്ത് ബോണിനെയാണ് ഫ്രഞ്ച് പ്രധാനമന്ത്രിയായി  പ്രസിഡന്റ് ഇമ്മാനുവേല്‍ മാക്രോണ്‍ പ്രഖ്യാപിച്ചത്.  നിലവിലെ പ്രധാനമന്ത്രി ജീന്‍ കാസ്റ്റെക്‌സ്  പ്രസിഡന്റിന് രാജിവെച്ച സാഹചര്യത്തിലാണ് മാക്രോണിന്റെ പുതിയ പ്രഖ്യാപനം.

3 പതിറ്റാണ്ടുകൾക്ക് മുന്‍പ് 1991 മെയ് മുതല്‍ 1992 ഏപ്രില്‍ വരെ പ്രസിഡന്റ് ഫ്രാങ്കോയിസ് മിത്തറാണ്ടിന്റെ കീഴില്‍ ഹ്രസ്വകാലത്തേക്ക് എഡിത്ത് ക്രെസണ്‍ എന്ന വനിത പ്രധാനമന്ത്രിയായിരുന്നു. പിന്നീട് പ്രധാനമന്ത്രി പദവിയിലേകെത്തുന്ന വനിതയാണ് എലിസബത്ത് ബോണ്‍. പരിസ്ഥിതി സംരക്ഷണം, വിദ്യാഭ്യാസം എന്നീ മേഖലകളിൽ എലിസബത്ത് ബോണ്‍ ആദ്യഘട്ടത്തില്‍ മുൻഗണന നൽകുമെന്നാണ് റിപ്പോർട്ടുകൾ.

ആദ്യ വീട് വാങ്ങാൻ ശ്രമിക്കുന്നവർക്കായി പുതിയ വാഗ്ദാനവുമായി ലിബറൽ സഖ്യം

Metrom Australia May 17, 2022 POLITICS , GOVERNMENT

ആദ്യ വീടു വാങ്ങാൻ ശ്രമിക്കുന്നവർക്കായി  പുതിയ വാഗ്ദാനവുമായി പ്രധാനമന്ത്രി സ്കോട്ട് മോറിസൻ. വീടു വാങ്ങുന്നതിനാവശ്യമായ നിക്ഷേപ തുക കണ്ടെത്താനായി സൂപ്പറാന്വേഷൻ ഫണ്ട് ഉപയോഗിക്കാൻ അനുവദിക്കും എന്നതാണ് പുതിയ തെരഞ്ഞെടുപ്പ് പ്രഖ്യാപനം.

തന്റെ സർക്കാർ വീണ്ടും അധികാരത്തിലെത്തിയാൽ, ആദ്യ വീടു വാങ്ങാൻ ശ്രമിക്കുന്നവർക്ക് സൂപ്പറാന്വേഷൻ നീക്കിയിരിപ്പിന്റെ 40 ശതമാനം അതിനായി ഉപയോഗിക്കാൻ അനുവാദം നൽകുമെന്നാണ് പ്രധാനമന്ത്രിയുടെ പ്രഖ്യാപനം. വീടു വിലയുടെ അഞ്ചു ശതമാനം തുക സമ്പാദ്യമായി കൈവശമുള്ളവർക്കാണ് ഇത്തരത്തിൽ സൂപ്പറാന്വേഷൻ തുക കൂടി ഉപയോഗിക്കാൻ കഴിയുക. പരമാവധി 50,000 ഡോളർ വരെയാകും ഇങ്ങനെ ഉപയോഗിക്കാൻ കഴിയുക.

എന്നാൽ എപ്പോഴെങ്കിലും ആ വീട് വിറ്റാൽ, സൂപ്പറാന്വേഷനിൽ നിന്ന് പിൻവലിച്ച തുക തിരിച്ചടയ്ക്കേണ്ടിവരും. വീടുവിലയിലെ വർദ്ധനവിൽ നിന്നും (ക്യാപിറ്റൽ ഗെയിൻസ്) ആനുപാതികമായ തുക കൂടി സൂപ്പർ ഫണ്ടിലേക്ക് നിക്ഷേപിക്കണം. 2023 ജൂലൈ ഒന്നു മുതൽ പദ്ധതി നടപ്പാക്കാനാണ് ഉദ്ദേശിക്കുന്നത്.

അതേസമയം പദ്ധതി നടപ്പാക്കിയാൽ വീടു വിലയിൽ താൽക്കാലികമായി വർദ്ധനവ് ഉണ്ടാകുമെന്ന് സൂപ്പറാന്വേഷൻ വകുപ്പ് മന്ത്രി ജെയ്ൻ ഹ്യൂം സമ്മതിച്ചു. അതായത്, 
വീടുവാങ്ങാൻ കാത്തിരിക്കുന്നവർ നേരത്തേ തന്നെ വിപണിയിലേക്ക് എത്തുന്ന സാഹചര്യമുണ്ടാകുമെന്നും, ഇത് താൽക്കാലികമായി വില കൂട്ടും എന്നും ജെയ്ൻ ഹ്യൂം പറഞ്ഞു. എന്നാൽ, ഇത് ഒഴിവാക്കാൻ സർക്കാരിന്റെ മറ്റു പദ്ധതികൾ സഹായിക്കുമെന്ന് പ്രധാനമന്ത്രി  വിശദീകരിച്ചു.

എരിതീയിൽ എണ്ണയൊഴിക്കുന്ന നടപടിയാണ് ലിബറൽ സഖ്യത്തിന്റേത് എന്ന് ലേബർ പാർട്ടി വിമർശനം ഉന്നയിച്ചു. ജോലിയിൽ നിന്ന് വിരമിച്ച ശേഷമുള്ള സുരക്ഷ ഇല്ലാതാക്കുന്ന നടപടിയാകും സൂപ്പർ നിക്ഷേപം പിൻവലിക്കലെന്ന് ലേബർ വക്താവ് ടാനിയ പ്ലിബർസെകും കുറ്റപ്പെടുത്തി.