ഡേവിഡ് വാര്‍ണറിനെ പിന്തുണച്ച് ഓസീസ് ക്യാപ്റ്റന്‍ പാറ്റ് കമ്മിന്‍സ്

Metrom Australia July 3, 2022 SPORTS


ബോള്‍ ടാംപറിങ്ങിന്റെ പേരില്‍ സ്ഥാനഭൃഷ്ടനാക്കപ്പെട്ട മുന്‍ ഓസീസ് നായകന്‍ ഡേവിഡ് വാര്‍ണറിനെ പിന്തുണച്ച് നിലവിലെ ടീം ക്യാപ്റ്റന്‍ പാറ്റ് കമ്മിന്‍സ്.
ഡേവിഡ് വാര്‍ണറിനെ ക്യാപ്റ്റന്‍ സ്ഥാനത്ത് നിന്നും ആജീവനാന്തം വിലക്കിയ നടപടി അംഗീകരിക്കാനാവില്ലെന്നാണ് അദ്ദേഹത്തിന്റെ അഭിപ്രായം.

‘എനിക്കും എന്റേതായ നിലപാടുകളുണ്ട്. അടിസ്ഥാനപരമായി ഒരാളെ ആജീവനാന്തം വിലക്കുന്ന നടപടി തെറ്റ് തന്നെയാണ്. ആളുകള്‍ക്ക് തങ്ങളുടെ തെറ്റ് മനസിലാക്കാനും തിരുത്താനുമുള്ള അവസരമാണ് നല്‍കേണ്ടത്. അതുകൊണ്ട് തന്നെ അടിസ്ഥാനപരമായി ഞാനതിനെ എതിര്‍ക്കുന്നു. അദ്ദേഹം മികച്ച ഒരു ക്യാപ്റ്റനാണ്. അദ്ദേഹത്തിന് ഒരു ഉത്തരവാദിത്തം നല്‍കുകയാണെങ്കില്‍ വാര്‍ണര്‍ അത് മികച്ച രീതിയില്‍ തന്നെ പൂര്‍ത്തിയാക്കും,’ എന്ന് കമ്മിന്‍സ് പറയുന്നു.

2018ലായിരുന്നു സാന്‍ഡ്‌ പേപ്പര്‍ ഗേറ്റ് ഇന്‍സിഡന്റ് എന്ന പേരില്‍ കുപ്രസിദ്ധമായ ബോള്‍ ടാംപറിങ് നടന്നത്. വാര്‍ണറിന് പുറമെ കാമറൂണ്‍ വെന്‍ക്രാഫ്റ്റ്, അന്നത്തെ ക്യാപ്റ്റന്‍ സ്റ്റീവ് സ്മിത്ത് എന്നിവര്‍ക്കും വിലക്ക് നേരിടേണ്ടി വന്നിരുന്നു. സ്മിത്തിനെ ക്യാപ്റ്റനാവുന്നതില്‍ നിന്നും രണ്ട് വര്‍ഷത്തേക്കും വാര്‍ണറിനെ ആജീവനാന്ത കാലത്തേക്കുമായിരുന്നു ക്രിക്കറ്റ് ഓസ്‌ട്രേലിയ വിലക്കിയത്. 

വാര്‍ണറായിരുന്നു സംഭവത്തിന്റെ മാസ്റ്റര്‍ മൈന്‍ഡ് എന്ന് കണ്ടെത്തിയതോടെയാണ് താരത്തെ ആജീവനാന്ത കാലത്തേക്ക് വിലക്കിയത്. എന്നാല്‍ താരത്തിന്റെ വിലക്ക് പിന്‍വലിക്കാന്‍ ക്രിക്കറ്റ് ഓസ്‌ട്രേലിയക്ക് പലകോണുകളില്‍ നിന്നും സമ്മര്‍ദ്ദമുണ്ടായിരുന്നു. നിരവധി ബി.ബി.എല്‍ ടീമുകള്‍ വാര്‍ണറിന്റെ വിലക്ക് മാറ്റണമെന്ന് ക്രിക്കറ്റ് ഓസ്‌ട്രേലിയയോട് നിര്‍ദേശിച്ചിരുന്നു.

സിറാജിനെതിരെ ഉണ്ടായ വംശീയ അധിക്ഷേപത്തെ കുറിച്ച് ഓസീസ് താരം ടിം പെയ്ന്‍

Metrom Australia June 22, 2022 SPORTS

ഇന്ത്യയുടെ ഓസ്‌ട്രേലിയന്‍ പര്യടനത്തില്‍ ഇന്ത്യന്‍ താരം മുഹമ്മദ് സിറാജിന് ഏല്‍ക്കേണ്ടി വന്ന വംശീയ അധിക്ഷേപത്തെ കുറിച്ച് മുന്‍ ഓസ്‌ട്രേലിയന്‍ നായകന്‍ ടിം പെയ്ന്‍. ഒരു ഡോക്യു-സീരിസിലായിരുന്നു പെയ്‌നിന്റെ തുറന്നുപറച്ചില്‍.

’സിറാജിനടുത്തേക്ക് ചെന്നത് ഞാന്‍ ഇന്നും ഓര്‍ക്കുന്നുണ്ട്. അവന്റെ കണ്ണുകള്‍ നിറഞ്ഞൊഴുകുകയായിരുന്നു. അത് അവനെ ആഴത്തില്‍ മുറിവേല്‍പിച്ചിരുന്നു. അവന്റെ പിതാവിന്റെ മരണത്തിന്റെ വേദനയിലൂടെയായിരുന്നു അവന്‍ പൊയ്‌ക്കൊണ്ടിരുന്നത്. അത് ഒരിക്കലും സംഭവിക്കാന്‍ പാടില്ലാത്തതായിരുന്നു,’ - എന്ന് പെയ്ന്‍ പറയുന്നു.

2020-21ലെ ഓസീസ് പര്യടനത്തിലെ സിഡ്‌നി ടെസ്റ്റിലായിരുന്നു ഓസീസ് ആരാധകരില്‍ നിന്നും സിറാജിന് വംശീയമായ അധിക്ഷേപം നേരിടേണ്ടി വന്നത്. ബൗണ്ടറി റോപ്പിനടുത്ത് ഫീല്‍ഡ് ചെയ്യുമ്പോഴായിരുന്നു സംഭവം. ഉടനെ തന്നെ സിറാജ് ഇന്ത്യന്‍ ക്യാപ്റ്റന്‍ (അന്നത്തെ) അജിന്‍ക്യ രഹാനെയെയും ഫീല്‍ഡ് അമ്പയര്‍മാരെയും അറിയിച്ചു.

ഇന്ത്യന്‍ താരങ്ങള്‍ പരാതി ഉന്നയിച്ചതോടെ അവരെ സ്‌റ്റേഡിയത്തില്‍ നിന്നും പുറത്താക്കിയിരുന്നു. സംഭവത്തില്‍ ഇന്ത്യന്‍ ടീമിനും സിറാജിനും പൂര്‍ണ പിന്തുണയായിരുന്നു ക്രിക്കറ്റ് ഓസ്‌ട്രേലിയ നല്‍കിയത്.

നീരജ് ചോപ്രയ്ക്ക് കുര്‍തനെ ഗെയിംസില്‍ സ്വര്‍ണം

Metrom Australia June 19, 2022 SPORTS

ഫിന്‍ലന്‍ഡിലെ കുര്‍തനെ ഗെയിംസില്‍ ഇന്ത്യയുടെ ഒളിമ്പിക്‌സ് സ്വര്‍ണമെഡല്‍ ജേതാവ് നീരജ് ചോപ്രയ്ക്ക് സ്വർണ്ണ തിളക്കം. ജാവലിന്‍ ത്രോയില്‍ 86.69 മീറ്റര്‍ ദൂരം എറിഞ്ഞാണ് നീരജ് ചോപ്ര സ്വര്‍ണ നേട്ടം കൈവരിച്ചത്. കഴിഞ്ഞ വര്‍ഷം നടന്ന ഗെയിംസില്‍ 86.79 മീറ്റര്‍ എറിഞ്ഞ ചോപ്ര മൂന്നാം സ്ഥാനമായിരുന്നു കരസ്തമാക്കിയത്. കൂടാതെ ഇംഗ്ലണ്ടിലെ ബര്‍മിങ്ഹാമില്‍ ജൂലൈ  28 മുതല്‍ ഓഗസ്റ്റ് 8 വരെ നടക്കുന്ന കോമണ്‍വെല്‍ത്ത് ഗെയിംസിനുള്ള 37 അംഗ ഇന്ത്യന്‍ അത്‌ലറ്റിക് സംഘത്തെ ഇത്തവണ നീരജ് ചോപ്ര നയിക്കുമെന്നാണ് റിപ്പോര്‍ട്ടുകള്‍ പുറത്തുവരുന്നത്.

അയർലൻഡനെതിരെ സഞ്ജു കളിക്കില്ലെന്ന മുൻ ഇന്ത്യൻ താരം ആകാശ് ചോപ്ര

Metrom Australia June 19, 2022 SPORTS

അയർലൻഡിനെതിരായ ട്വന്റി-20 പരമ്പരയിൽ മലയാളി താരവും രാജസ്ഥാൻ റോയൽസ് നായകനുമായ സഞ്ജു സാംസൺ കളത്തിലിറങ്ങില്ലെന്ന് മുൻ ഇന്ത്യൻ താരം ആകാശ് ചോപ്ര. രണ്ട് മത്സരങ്ങൾ മാത്രമുള്ള പരമ്പരയിൽ സഞ്ജുവിനേക്കാൾ സാധ്യത മറ്റു താരങ്ങൾക്കാണെന്നാണ് ചോപ്രയുടെ വിലയിരുത്തൽ. 

'വിക്കറ്റ് കീപ്പർ ബാറ്റർ ഋഷഭ് പന്തിന്റെ അഭാവത്തിൽ ആര് നാലാം നമ്പരിൽ ആര് ഇറങ്ങുമെന്നതാണ് പ്രധാനപ്പെട്ട ചോദ്യം. സഞ്ജു സാംസൺ, ദീപക് ഹൂഡ, രാഹുൽ ത്രിപാഠി ഇവരിൽ ആര് കളത്തിലിറങ്ങും? മൂന്നാം നമ്പറിൽ സൂര്യകുമാർ യാദവുണ്ട്. ഇന്നിം​ഗ്സ് തുടങ്ങാൻ ഇഷാൻ കിഷനും, ഋതുരാജ് ​ഗെയ്ക്വാഡ് എന്നിവർ തന്നെ നിലനിൽക്കും. താരതമ്യപ്പെടുത്തുമ്പോൾ ദീപക് ഹുഡയാണ് നാലാം നമ്പറിൽ ഇറങ്ങേണ്ടത്. നായകൻ ഹർജിക് പാണ്ഡ്യ നാലാം സ്ഥാനത്ത് എത്തിയാൽ, അഞ്ചാമതായി ഹുഡയെ പരി​ഗണിക്കണം. കാര്യങ്ങൾ ഇങ്ങനെയായാൽ ത്രിപാ‍ഡിയും സഞ്ജും പുറത്തിരിക്കേണ്ടി വരും. ആകെയുള്ള രണ്ട് മത്സരങ്ങളിൽ എത്ര മാറ്റങ്ങളാണുണ്ടാവുക'. ആകാശ് ചോപ്ര ചോദിച്ചു.

അതേസമയം ഋഷഭ് പന്തിന് പകരക്കാരനായിട്ടാണ് സ‍ഞ്ജു ടീമിലെത്തിയത്.
അയർലൻഡിനെതിരെ ഡബ്ലിനിൽ ജൂൺ 26നും 28നുമാണ് ഇന്ത്യയുടെ രണ്ട് മത്സരങ്ങൾ.

ഐപിഎൽ: ടിവി, ഡിജിറ്റല്‍ സംപ്രേഷണാവകാശം സ്റ്റാറിനും വയാകോമിനും

Metrom Australia June 15, 2022 SPORTS

അടുത്ത അഞ്ചു വര്‍ഷത്തെ ഐപിഎല്‍ മത്സരങ്ങളുടെ സംപ്രേഷണവകാശം സ്റ്റാര്‍ സ്പോര്‍ട്സും(ടിവി) റിലയന്‍സ് ഗ്രൂപ്പിനു കീഴിലുള്ള വയാകോമും (ഡിജിറ്റല്‍) സ്വന്തമാക്കി. ഈ വാർത്ത ബിസിസിഐയും 
ഔദ്യോഗികമായി സ്ഥിരീകരിച്ചു. 2023-2027 കാലയളവിലേക്കുള്ള സംപ്രേഷണവകാശമാണ് സ്വന്തമാക്കിയത്.  

മൂന്ന് ദിവസങ്ങളിലായി നടത്തിയ ഇ-ലേലത്തിലൂടെ ആകെ 48,390.52 കോടി രൂപയാണ് ടിവി, ഡിജിറ്റല്‍ സംപ്രേഷണാവകാശം വിറ്റതിലൂടെ ബിസിസിഐക്ക് ലഭിക്കുക. റെക്കോര്‍ഡ് തുകക്ക് സംപ്രേഷണവകാശം വിറ്റതിലൂടെ ലോകത്തിലെ ഏറ്റവും സംപ്രേഷണമൂല്യമുള്ള രണ്ടാമത്തെ ടൂര്‍ണമെന്‍റായി ഐപിഎല്‍ മാറി. 

23,575 കോടി രൂപക്കാണ് സ്റ്റാര്‍ ഇന്ത്യ അടുത്ത അഞ്ച് വര്‍ഷത്തേക്കുള്ള ടെലിവിഷന്‍ സംപ്രേഷണവകാശം സ്വന്തമാക്കിയത്. 20,500 കോടി രൂപക്ക് വയാകോം ഡിജിറ്റല്‍ സംപ്രേഷണവകാശം സ്വന്തമാക്കി. 18 നോണ്‍ എസ്ക്ലൂസിവ് മത്സരങ്ങളുടെ ഡിജിറ്റല്‍ സംപ്രേഷണവകാശത്തിനായി വയാകോം 3, 258 കോടി രൂപ കൂടി നല്‍കണം. ഓവര്‍സീസ് സംപ്രേഷണ അവകാശത്തിനായി 1057 കോടി രൂപ വയാകോമും ടൈംസ് ഇന്‍റര്‍നെറ്റും കൂടി മുടക്കി.

ടെലിവിഷന്‍ സംപ്രേഷണവകാശം നേടിയ സ്റ്റാര്‍ സ്പോര്‍ട്സ് ഓരോ മത്സരത്തിനും 57.5 കോടി രൂപ ബിസിസിഐക്ക് നല്‍കണം. ഡിജിറ്റല്‍, സംപ്രേഷണാവകാശം സ്വന്തമാക്കിയ വയാകോം ഓരോ മത്സരത്തിനും 50 കോടി രൂപയാണ് ബിസിസിഐക്ക് നല്‍കേണ്ടത്.കഴിഞ്ഞ സീസണ്‍ വരെ ഡിസ്നി ഗ്രൂപ്പിന്‍റെ കീഴിലുള്ള സ്റ്റാറിനും ഹോട് സ്റ്റാറിനുമായിരുന്നു ടിവി, ഡിജിറ്റല്‍ സംപ്രേഷണവകാശം.